Pagina Inicial»Noticia
Parlamento Nacional liu hussi Comissão G ne’ebe trata assunto Educação, Joventude, Cultura e Cidadania ne’ebe lidera hussi Presidente Comissão, Deputado Antonio Verdial de Sousa, acompanha ho nia membro sira, halo fiscalização iha Suco Buibau Posto Administrativo Quelicai Município Baucau, iha loron 22 fulan outubro tinan 2020.
Objetivo hussi visita fiscalização ne’e atu haree condição escola Ensino Básico Filial Buibau, ne’ebé enfrenta hela dificuldade barak liuliu infraestrutura, sala de aula, agua potável no seluk tan.
Hafoin ida ne’e Comissão G continua kedas ba Suco Afaça Posto Administrativo Quelicai, hodi hassoru malu ho professor sira inclui estudante sira Escola Secundaria Geral Dom Carlos Filipe Ximenes Belo SDB.
Iha sorumutu ne’e, Coordenador Escola Secundaria Geral Dom Carlos Filipe Ximenes Belo SDB, professor Carlos Filipe Ximenes apresenta preocupação hirak ne’ebé escola ne’e enfrenta inclui recomendação balun ba Comissão G atu considera, liuliu estatuto professor sira voluntario ne’ebé tinan 7 ona la simu ossan, reunião ne’e ho presença Diretor Educação Município hodi partilha informação balun kona-ba educação iha Município Baucau no contínua kedas ba visita escola Católica Daranefa.
Durante hassoru malu ho professor sira, Presidente Comissão G promete sei apresenta preocupação hirak ne’e ba ministério relevante hodi buka solução.
