Comissão F, Parlamento Nacional ne’ebé trata assuntos Saúde, Segurança Social e Igualdade de Género, halo visita fiscalização hodi observa processo pagamento subsídio ba comunidade iha posto administrativo rua mak hanesan Cristo Rei no Dom Aleixo, iha loron 10 fulan Junho tinan 2020.
Objetivo hussi fiscalização ne’e atu observa direita processo pagamento subsídio dólar atus ida ba família sira ne’ebe mak ho rendimento menus hosi dólar atus lima kada fulan, iha âmbito covid 19 nian.
Durante fiscalização ne’e, Deputados sira rona direita explicação hussi Chefe Suco sira mak hanesaan Chefe Suco Becora, Camea no Culuhun kona- ba dadus uma kain ne’ebé mak suco sira submete ba Ministério Administração Estatal, iha família balun mak naran laiha, maibe autoridade local sira sei prepara lista ba naran sira ne’ebé mak laiha, hodi submete filafali ba ministério competente.
Fiscalização ne’e fahe ba grupo rua, grupo ida ba posto Administrativo Cristo Rei, lidera hussi Presidente Comissão F, Deputado Noé da Silva Ximenes, acompanha hussi Deputados balun membro Comissão F nian no grupo seluk ba Posto Administrativo Dom Aleixo, lidera hussi Vice- Presidente Comissão F, Deputado Félix da Costa acompanha mos hussi Deputados balun membro Comissão F nian.
