Presidente Parlamento Nacional, Arão Noé de Jesus da Costa Amaral, acompanha hussi Vice-Presidente nain rua, Deputada Maria Angelina Lopes Sarmento ho Deputado Luis Roberto da Silva, halo reunião ho Presidente Comissão sira, Secretária-Geral Parlamento Nacional, Secretário-Geral Adjunto no Diretor sira, iha loron 15 fulan abril tinan 2020 iha sala Conferências Parlamento Nacional.
Reunião ne’e ho objetivo atu hare programa fiscalização Comissão Especializadas Permanentes sira nian ba Municípios, liu-liu iha Parte fronteira sira hanesan Maliana, Batugede, Suai, Mota Masin no Oecússi.
Relaciona ho assunto ne’e, Presidente Comissão sira husu Secretariado-Geral Parlamento Nacional nian, atu fo apoio facilidade ba prevenção Covid-19 hanessan máscara, óculos no desinfetantes liman nian, atu nune durante fiscalização Membro Deputado sira inclui técnico Parlamento Nacional bele protege sira nia a’an.
Ikus liu, Presidente Parlamento Nacional informa ba Presidente Comissão sira katak, iha quinta-feira, 16 de abril de 2020, sei iha reunião Plenária extraordinária ho Governo konaba pandemia Covid-19 nian, ne’e duni semana ne’e sei laiha fiscalização, ho nune’e, programa fiscalização sei hahu iha semana oin.
