Pagina Inicial»Noticia
Parlamento Nacional, liu hussi reunião Plenária ordinária iha loron 09 fulan março tinan 2020, Deputado sira hato’o sira nia preocupação relaciona ho vírus oioin ne’ebé mak mossu iha Timor-Leste.
Vírus hirak ne’e mak hanessan¸ vírus peste ne’ebé mak estraga população nia ai-han sira iha toos no natar, Vírus moras fahi nian, Vírus dengue no ikus vírus ne’ebé mak sai popular iha mundo mak Vírus corona.
Iha intervenção diversas, Deputado sira questiona mos problemas necessidade básico mak hanessan, problema educação; Problema Estrada no ponte; Problema bee-moos no eletricidade; Problema Saúde; Lixo iha cidade Díli laran; media ne’ebé mak fó sai informação hodi cria confusão iha público no mos informação importante sira seluk.
Hatán ba problema ne’ebé levanta hussi Deputado sira, Secretário de Estado da Comunicação Social, Mericio Juvinal Akara hatete, problema media, Governo labele halo intervenção direita, no garantia nafatin liberdade de expressão, maibé, Governo sei hato’o ba Conselho de Imprensa hodi resolve tanba Conselho de imprensa mak tau matan direita ba media sira nia serviço; em relação ho coronavírus, Governo tau atenção makas no halo colaboração ho Organização Saúde Mundial, hodi dissemina nafatin informação ba ema hotu-hotu liuhussi media Estadu nian mak hanessan, Radio e Televisão Timor-Leste Empresa publica (RTTL.ep), TATOLI no Radio Comunidade iha município sira; Informação seluk sei encaminha nafatin ba ministério competente hodi toma atenção no resolve.
Além de informação diversas, Comissão F ne’ebé trata assunto Saúde, Segurança e Igualdade de Género no Comissão G ne’ebé trata assunto Educação, Juventude, Cultura e Cidadania, submete no distribui iha plenário sira nia Relatório de Fiscalização iha RAEOA.
Mesa hato’o mos informação ba plenário kona-ba Bancada sira ne’ebé maka hato’o ona carta ba MESA kona-ba Indicação Deputado Jovem ne’ebé mak ho idade máximo 45 anos. nune’e mos carta hussi Bancada Parlamentar PLP relativa à indicação Deputado sira ba Assembleia Interparlamentar da Asean (APA).
Nune’e mos, Presidente do Grupo Mulheres Parlamentares de Timor-Leste (GMPTL), hato’o mensagem relaciona ho Comemoração Loron Internacional feto nian 08 de março de 2020.
Sessão Plenária ne’e preside hussi Vice-Presidente Parlamento Nacional, Luis Roberto da Silva, acompanha hussi membro da Mesa sira, no hetan presença hussi Secretário de Estado da Comunicação Social, Mericio Juvinal Akara.
