Pagina Inicial»Noticia
Parlamento Nacional iha loron 30 fulan agosto tinan 2019, liu hussi Sessão Solene comemora tinan 20 Aniversario Referendo no Missão INTERFET.
Antes de Sessão Solene, Presidente do Parlamento Nacional, Arão Noé de Jesus da Costa Amaral, hala’o encontro ho Presidente da Assembleia da República de Portugal, Eduardo Ferro Rodrigues, hanessan representante Presidente da República Portugal, no representante Secretário-Geral da Nações Unidas, Ian Martin.
Hafoin reunião, Presidente do Parlamento Nacional ho nia homólogo sira hakat ba sala Plenário no hahú Sessão Solene.
Presidente do Parlamento Nacional fó tempo ba representante bancada parlamentar sira hodi halo declaração ne’e ko’alia kona-ba historia povo Timor-Leste nian ho nia luta ne’ebé nunca kole hodi hetan liberdade, no sacrifício hirak ne’ebé oferece ba independência ho tulun hussi comunidade internacional hanessan Portugal, no Nações Unidas. Ko’alia mós kona-ba acordo Fronteira Marítima ne’ebé marca historia ba nação.
Hafoin ida-ne’e, representante Secretário-Geral das Nações Unidas, Ian Martin, iha discurso hatete elogia serviço Nações Unidas, Portugal, no saudoso Sérgio Vieira de Mello inclui entidade sira seluk iha processo independência Timor-Leste nian. Nune’e mós determinação timoroan sira iha rai li'ur hodi lori independência no liberdade, hatuur nação ida iha paz no pacifico ho nia vizinho sira.
Entretanto Presidente da Assembleia da República de Portugal, Eduardo Ferro Rodrigues, informa ho coragem no firme timoroan sira-nian hodi buka paz, la haluha hetan referencia hussi Portuguesa sira ne’ebé fundamental hanessan Jorge Sampaio, António Guterres no Ana Gomes. Ko’alia mós kona-ba desafio foun ne’ebé Timor-Leste enfrenta agora hanessan educação, desenvolvimento económico, saúde, no seluk tan.
Ikus hussi Sessão Solene ne’e Presidente do Parlamento Nacional iha nia discurso hahú ho agradecimento ba presença convidado sira iha momento importante liu ba nação ida-ne’e. Katak dalan ba independência la'ós fácil, maibé hatudu katak hamutuk ho comunidade internacional bele atingi iha processo ne’e hanessan Portugal, CPLP, Nações Unidas, Estados Unidos da América no Indonésia. Além de ne’e elogia herói ne’ebé la hatene kolen ne’ebé lakon nia vida ba rai ida ne’e. No ikus liu agradece boot ba Kay Rala Xanana Gusmão ho entrado em vigor ba Tratado das Fronteiras Marítimas.
Sessão Solene ne’e termina ho visita exposição ba fotografia sira “Das Cinzas à Reconciliação, Reconstrução e Desenvolvimento Nacional”, ho filme kona-ba “A Língua Portuguesa é a nossa Língua” hussi convidado tomak.
Presença iha Sessão Solene ne’e mak Primeiro-Ministro de Timor-Leste, Taur Matan Ruak, no membro do Governo balun, Presidente do Tribunal de Recurso, Deolindo dos Santos, Presidente da Assembleia de Portugal, Eduardo Ferro Rodrigues, ho nia comitiva, Ministro da Defesa de Portugal, João Gomes Cravinho, Embaixador sira iha Timor-Leste, representante do Secretário-Geral das Nações Unidas, Ian Martin, no Primeiro-Ministro do Vanuatu no convidado sira seluk.
