V Assembleia Parlamentar Comunidade dos Países de Língua Portuguesa nian (AP-CPLP) sei hala’o iha Parlamento Nacional Timor-Leste nian, iha dia 9, 10 e 11 abril 2014. Iha fulan novembro kotuk acontece iha Luanda, Angola, IV Assembleia Parlamentar Comunidade dos Países de Língua Portuguesa nian (AP-CPLP), no iha momento ne’ebá Parlamento Nacional de Timor-Leste remata tinan rua ne’ebé kaer Presidência Assembleia Parlamentar nian, no entrega knaar ne’e ba Assembleia Nacional de Angola.
Parlamento Nacional de Timor-Leste hahú kaer Presidência AP-CPLP nian iha 2011 durante III Assembleia Parlamentar, ne’ebé hala’o iha Díli. V AP CPLP sei hala’o filafali iha capital Timor-Leste nian tanba ita-nia nação sei kaer Presidência husi Conferência de Chefes de Estado e de Governo da CPLP.
Enquanto Angola kaer Presidência, iha 2013-2015, Presidente do Parlamento Timor-Leste nian kaer cargo Vice-Presidente da Mesa da Assembleia Parlamentar no Sra. Deputada Maria Fernanda Lay sai Secretária da Mesa da Assembleia Parlamentar iha período ne’e. Durante período 2013/2015 Timor-Leste sei kaer mós cargo nu’udar Vice-Presidente da Comissão de Economia, Ambiente e Cooperação.
Assembleia Parlamentar CPLP nian
Comunidade dos Países de Língua Portuguesa - CPLP nu’udar fórum multilateral ne’ebé di’ak atu hametin amizade ba malu no cooperação entre nia membro sira. CPLP cria iha 17 julho 1996 no iha personalidade jurídica no mós autonomia financeira.
AP-CPLP nu’udar órgão CPLP nian ne’ebé halibur representação husi Parlamento sira hotu iha Comunidade, ne’ebé constitui baseia ba resultado husi eleição legislativa iha nação ida-idak, no buka atu contribui atu haforça CPLP nia atuação no halo ema barak liu hatene no hahi’i Comunidade ne’e.
Ninia primeira reunião hala’o iha São Tomé iha 27-28 abril 2009 ho participação husi delegações husi Parlamento Angola, Cabo Verde, Brasil, Guiné-Bissau, Moçambique, Portugal, São Tomé e Príncipe no Timor-Leste nian. Iha reunião ne’e aprova ninia Estatutos e Regimento no halo eleição ba ninia Presidente, Dr. Francisco da Silva, Presidente da Assembleia Nacional São Tomé e Príncipe nian.
Assembleia Parlamentar nia órgão sira maka: Presidente da Assembleia Parlamentar, Conferência dos Presidentes dos Parlamentos ho Plenário.
Iha III Assembleia Parlamentar, ne’ebé hala’o iha Díli, estabelece comissão permanente tolu: Comissão de Política, Estratégia, Legislação, Cidadania e Circulação; Comissão de Economia, Ambiente e Cooperação; Comissão de Língua, Educação, Ciência e Cultura.
Ita mós tem que temi Rede de Mulheres Parlamentares, ka RM-AP-CPLP, organismo Assembleia Parlamentar nian ne’ebé tau matan ba questões igualdade no equidade género nian.
Atu hetan informação tan kona-ba atividade AP-CPLP nian consulta lai página www.ap-cplp.org.