Pagina Inicial»Noticia
Iha loron 7 fulan novembro tinan 2018, Presidente Parlamento Nacional, Arão Noé de Jesus da Costa Amaral, fó pose ba Provedora dos Direitos Humanos e Justiça (PDHJ), Sra. Jesuína Maria Gomes Ferreira, ho mandato tinan haat. Cerimónia ida ne’e realiza iha sala de conferência Parlamento Nacional.
Depois de simu pose, iha intervenção Sra. Provedora hateten, PDHJ hanessan instituição independente no imparcial ne’ebé tau matan no fiscaliza serviço governo no entidades publica sira; atu serviço hamutuk hodi halo prevenção ba violação Direitos Humanos no Boa Governação nomos recomenda ação hodi halo correção ba irregularidade ne’ebé mossu, laos atu sai inimigo. Serviço PDHJ nian mak atu hare, rona no kolia ba malu, maibé dala ruma mossu desafio no resistência hóssi autoridade sira tambá ne’e mak PDHJ hussu nafatin apoio politico no apoio moral hóssi Parlamento Nacional.
Entretanto, iha discurso Presidente Parlamento Nacional hateten katak Provedor dos Direitos Humanos e Justiça hanessan órgão independente ho nia função atu aprecia no buka atu fó satisfação ba queixas hussi cidadão sira contra poderes públicos. Alem de ne’e, Presidente mos hatutan katak PDHJ nia papel fundamental atu hari cidadão ida ne’ebe ativa iha Estado Direito democrático .
Participa iha Cerimonia tomada de pose Vice-Presidente Parlamento Nacional Maria Angelina Lopes Sarmento, Lideres Bancadas Parlamentares, Deputados da Comissão A, Ministro da reforma legislativa Assunto Parlamentar, Fidélis Leite Magalhães, Provedor cessante Sr. Silveiro Pinto Baptista, adjunto PDHJ Sr. Horácio Almeida no convidados sira seluk .
