Pagina Inicial»Noticia
Comissão D iha Parlamento Nacional ne’ebé trata assunto Economia e Desenvolvimento, iha loron 24 too 26 fulan outubro tinan 2018, halo fiscalização ba Município Ermera.
Loron dahuluk ba fiscalização ne’e, Comissão D halo reunião ho diretor sira delegação territorial hanessan Diretor SEPFOPE, Diretor Agricultura, Diretor Meio Ambiente, no Diretor Turismo, hodi apresenta serviço cada direção hanessan progresso no dificuldade sira ne’ebé enfrenta durante ne’e.
Hafoin reunião ho diretor sira, iha loron daruak Comissão D halo fiscalização ba iha Centro Processamento Café hussi Companha NCBA iha suco Estado, NCBA iha Railaco, Companha Timor Global iha suco Eraulo.
Alem de ne’e, comissão mós visita grupo Pecuária hamutuk 11 iha suco Estado no suco Eraulo, ne’ebe simu fini karau vaca hussi Ministério da Agricultura, no continua ba suco Gou-olo hodi haree diretamente irrigação ne’ebe constrói iha tinan 2014 maibé too agora la uja tanba mota destrói iha 2015 liubá hodi dificulta comunidade sira halo natar.
Comissão mós visita Centro Viveiros Regional Ministério Agricultura nian iha Fatuquero Gleno hodi haree diretamente viveiro café, no contínua ba Centro Produção Manu-Tolun iha suco Railaco-Leten hodi haree diretamente funcionamento centro ne’e nian.
Atividade fiscalização ne’e lidera hussi Presidente Comissão D Deputada Virgínia Ana Belo, acompanha hussi membro comissão nian ho nia técnico sira.
