Comissão Ética nian hussi Parlamento Nacional hala’o, iha 12-13 novembro 2014, visita estudo ida ba Parlamento Singapura nian.
Parlamento nia delegação composta hussi Deputada Olinda Morais (PD), Presidente interina Comissão nian, Deputado Agostinho Lay (CNRT), Secretário Comissão nian, Deputada Ângela M. C. de Andrade Sarmento (CNRT), Deputado Manuel Soares Salsinha (CNRT) ho Deputada Angélica da Costa (FRETILIN).
Parlamento nia delegação hassoru malu ho membro na’in-rua hussi Grupo Parlamentar ba Região Austrália, Nova Zelândia no Pacífico nian: Deputado Alex Yam ho Deputado AngWeiNeng.
Durante visita ne’e delegação biban atu troca experiência kona-ba tema oioin hanessan atividade e papel comissão sira-nian, exercício mandato parlamentar nian no mecanismos ne’ebé deputado sira usa atu promove contacto ho eleitores no atu halo sira hakbessik ba Parlamento. Delegação observa mós estrutura hussi serviços secretariado, desenvolvimento sistema informático nian iha Parlamento, organização no serviços ne’ebé biblioteca disponibiliza no atividade principal sira hussi departamento educação cívica e parlamentar nian.
