Iha loron 14 fulan agosto tinan 2015, Sekretáriu Estadu Vaticanu Sua Eminensia Kardeal Pietro Parolin hala’o vizita kortezia ba Parlamento Nacional. Vizita Sekretariu Estadu ne’e akompanha hussi Amu Bispo Dioseze Baucau, no Administrador Apostoliku Diocese Díli, Dom Basílio do Nascimento, Amu Bispo Dioseze Maliana Dom Norberto do Amaral inklui representante Vatikanu ba Timor-Leste, ho Vise-ministru Negosiu Estrangeiru no Koperasaun Roberto Sarmento de Oliveira Soares.
Vizita ne’e simu hussi Vise-Presidente Parlamento Nacional Adérito Hugo da Costa no Sekretáriu Jerál Parlamentu Nasional Mateus Ximenes Belo, iha portão entrada Parlamento Nacional nian hodi hakat ba Gabinete Presidente Parlamento nian.
Durante minutu 30 nia laran, Prezidente Parlamento Nacional Vicente da Silva Guterres, akompanha hussi Vise-Presidente Adérito Hugo da Costa, Sekretáriu Estadu Asuntu Parlamentar Maria Terezinha Viegas no Sekretáriu Jeral Parlamento Nacional Mateus Ximenes Belo, hodi kongratula no ko’alia ba malu ho Sekretariu Estadu Vatikanu ne’e.
Vise-Prezidente Parlamentu Nasional Adérito Hugo da Costa dehan katak Parlamentu sei hala’o ratifikasaun ba Memorando de Entendimento (MoU) ne’ebé assina ona hussi Governo Timor-Leste ho Vatikanu rassik.
