Pagina Inicial»Noticia
Parlamento Nacional (PN) liu hussi sessão Plenária Extraordinária aprova ona pedido hussi Governo kona-ba debate Urgência ba Proposta de Lei no 22/V(3ª)-Orçamento Geral do Estado (OGE) 2020 nian, iha loron 17 fulan setembro tinan 2020.
Iha intervenção Ministro Finanças, Fernando Hanjam, justifica katak, pedido prioridade no urgência ne’e ho intenção atu normaliza hikas execução orçamental no hassa’e crescimento económico inclui mós atende necessidade prioridade sira nu’udar responsabilidade no compromisso Estado assume ona.
Hafoin ida ne’e, continua ho leitura ba relatório no parecer hussi Comissão C, ne’ebé trata assunto Finanças Públicas.
Ikus liu, Deputado sira halo aprovação ba pedido debate urgência ne’e ho votos a favor 54, contra 0 no abstenções 7. Ho aprovação ida ne’e, Mesa anuncio ba Comissão sira atu halo audiência ho Membro Governo sira tuir calendário tentativa ne’ebe planeia ona.
Tuir calendário tentativa hussi Comissão C nian, audiência ne’e sei hahú iha loron 23 fulan setembro tinan 2020, no discussão no aprovação iha Generalidade iha Plenária iha loron 01 to 02 fulan outubro, no iha loron 05 to’o 08 fulan outubro discussão no aprovação iha especialidade no final global iha plenária.
Sessão Plenária ne’e, preside hussi Presidente Parlamento Nacional, Aniceto Longuinhos Guterres Lopes, acompanha hussi estrutura Mesa nian, no marca presença hussi Governo nian representa hussi Ministro dos Assuntos Parlamentares e Comunicação, Francisco Jerónimo, Ministro das Finanças, Fernando Hanjam no Vice-Ministra Finanças, Sara Lobo Brites.
