Comissão E, ne’ebe trata assuntos Infraestrutura iha loron 1 fulan julho tinan 2020 halao fiscalização ba edifício Direção Nacional Transporte e Terrestre (DNTT) iha Hera Akanunu.
Objetivo hussi fiscalização ne’e atu hare direitamente serviço DNTT nian liga ho processo sira kona-ba produção cartão condução ba cidadão sira, mak hanessan processo simu Documentos hussi Cidadão, no mos observa processo exame escrita no prática.
Além de ne’e, Deputado sira mos observa maquina produção cartão ne’ebé avaria no mos observa condição edifício direção ne’ebé la dun diak hodi atende cidadão sira.
Fiscalização ne’e lidera hussi Presidente Comissão E, Abel Pires acompanha hussi Deputado sira Comissão nian, ho presença Diretor Nacional Transporte Terrestre, Natalino do Rosário ho nia equipa.
Nune’e mos, Comissão D ne’ebé trata assuntos Economia no Desenvolvimento halao audiência ho Comissão de Elaboração do Plano de Recuperação Económico; Comissão F ne’ebé trata assuntos Educação, Saúde, Segurança Social e Igualdade de Género halao audiência ho Ministra de Saúde kona-ba apresentação do Relatório de Execução do Orçamento Covid-19.
