Pagina Inicial»Noticia
Parlamento Nacional iha loron 10 fulan março tinan 2020, realiza debate urgência ho Ministro da Defesa e Ministro do Interior interino, Filomeno da Paixão de Jesus no Comandante Geral da Polícia Nacional de Timor-Leste (PNTL), Faustino da Costa, kona-ba caso falsificação ossan ne’ebé horas ne’e daudaun publica iha rede social.
Pedido debate urgência ne’e apresenta hussi Bancada CNRT iha semana kotuk, tanba iha caso refere temi mós liderança balun nia naran no bele mós afeta ba relação bilateral rai rua nian.
Relaciona ho debate urgência refere mossu diferencia opinião entre bancada parlamentar sira liuliu bancada FRETILIN ne’ebé hussu atu discute de’it iha Comissão B, tanba caso ne’e rassik complexo no atu continua assegura segredo justiça nian, maibé hafoin liu hussi votação, maioria Deputado decide atu continua debate iha sala Plenária enquanto Bancada FRETILIN decide la participa iha debate ne’e.
Ministro da Defesa e Ministro do Interior interino iha explicação ba Deputado sira katak caso ne’e iha ona investigação hussi parte Policia no Ministério Publico Indonésia nian tanba acontece iha Indonésia, no caso ne’e rassik iha ona segredo justiça.
Comando PNTL rassik investiga ona veracidade hussi vídeo ne’ebé publica iha rede social inclui autor ne’ebé publica.
Parte Governo liu hussi Ministro da Defesa no Ministro Interior interino simu ona relatório preliminar hussi caso refere no continua acompanha too transitado em julgado.
Sessão Plenária ne’e preside hussi Presidente do Parlamento Nacional, Arão Noé de Jesus da Costa Amaral, acompanha hussi membro da Mesa sira no hetan presença hussi Ministro da Defesa e Ministro do Interior interino, Filomeno da Paixão de Jesus no Comandante Geral da Polícia Nacional de Timor-Leste (PNTL), Faustino da Costa.
