Pagina Inicial»Noticia
Formando sira PNTL, hussi Centro Formação Polícia Nacional Timor-Leste hamutuk ema na’in 53, composto hussi feto 8 no mane 45 halo visita guiada ba Parlamento Nacional, iha loron 20 fulan janeiro tinan 2020.
Visita guiada ne’e abertura oficialmente hussi Secretária-Geral Parlamento Nacional, Cedelizia Faria dos Santos. Iha nia intervenção, Secretária-Geral hato’o Benvindo ba formando sira hussi PNTL ne’ebé mak mai visita iha Uma Fukun Parlamento Nacional hodi hatene serviço segundo órgão soberania ne’e nian. Iha biban hanessan, Secretária-Geral mós apresenta serviço Secretariado-Geral Parlamento Nacional nian ba formando sira.
Nune mós, representante hussi PNTL, Diretor do Curso, Inspetor Chefe, Silveiro de Araújo iha ninia intervenção hatete, agradece ba Parlamento Nacional hodi bele simu formando sira hussi Centro Formação Policia hodi mai visita Parlamento Nacional hanessan parte iha hodi completa sira nia formação antes halo graduação.
Depois de intervenção, continua ho apresentação matéria kona-ba papel no funcionamento Parlamento Nacional nian, ne’ebé apresenta hussi Diretor Apoio Parlamentar, Joaquim Vicente no ikus liu formando sira halo visita guaiada iha areadores Parlamento Nacional.
Visita guiada ne’e fahe ba grupo rua primeiro grupo iha parte dadeer no segundo grupo iha parte lokraik.
